Efni frá tuttugu löndum

Nýverið héldu kraftajötnar landsins upp á tuttugu ára afmæli aflrauna á Íslandi á Kaffi Reykjavík. Þar sýndi Hjalti Úrsus brot úr heimildarmynd sem hann er með í bígerð um ævi þekktasta aflraunamanns heims, Jóns Páls Sigmarssonar. Nýleg könnun, sem Gallup gerði fyrir Visa Europe og birtist í fjölmiðlum í gær, sýnir að Jón Páll á enn sinn fasta samastað í þjóðarsálinni því Íslendingar töldu hann vera þann íþróttamann sem væri í mestum metum.

Í janúar á næsta ári eru þrettán ár síðan Jón Páll lést langt fyrir aldur fram, aðeins 33 ára að aldri. "Það hefur engum tekist að feta í fótspor Jóns Páls og hann á mikinn heiður að því hversu vinsælar aflraunir eru í dag," segir Hjalti, sem undanfarin þrjú ár hefur verið að safna efni í myndina en hann hefur fengið Steingrím Þórðarson til liðs við sig. "Við erum með umsókn í Kvikmyndasjóðnum og reiknum með að koma myndinni í kvikmyndahús í september á næsta ári," útskýrir hann en úgáfufyrirtækið Sena hefur einnig keypt sig inn í þessa framleiðslu.

Hjalti segir að það verði ekkert til sparað við gerð myndarinnar og þeir muni meðal annars fá efni frá yfir tuttugu löndum enda þurfti Jón Páll að fara víða til að keppa. Þá reiknaði hann með að þeir sviðsettu einhver atriði úr æsku Jóns Páls og að þær tökur yrðu í maí. Þekktir kappar eins og Jeff Capes munu tjá sig um Jón en þeir tveir háðu oft harða keppni á sínum tíma. Hjalti segir því ljóst að það verði af nógu að taka en hann er þó hvergi banginn.

"Ég tel mig þekkja þessa sögu nokkuð vel," segir hann. Jón Páll var feykilega vinsæll íþróttamaður og vakti mikla athygli á bæði land og þjóð með einstakri framkomu sinni. Hann vann titilinn "Sterkasti maður heims" fjórum sinnum og var kjörinn Íþróttamaður ársins 1981. Vinsældir Jóns Páls eru engu minni erlendis og á spjall­síðum má sjá að aðdáendur kappans bíða í ofvæni eftir myndinni. Sjálfur segist Hjalti hafa fengið beiðnir um að setja upp pöntunarlista á netinu fyrir DVD-útgáfuna.