Kemur heim með kórónu í farteskinu

Íslendingar hafa enn einu sinni fengið staðfestingu á því að á Íslandi búa fallegustu konur veraldar. Unni Birnu hafði verið spáð góðu gengi í keppninni en sjálf lét hún væntingarnar ekki stíga sér til höfuðs. Eftir lokaæfinguna á föstudagskvöldið skrifaði hún dagbókarfærslu á vef Morgunblaðsins þar sem hún varaði fólk við því að taka spárnar of trúanlega. "Það er ekkert að marka svona spár og veðbanka og ég get lofað ykkur því, eins og ég hef gert áður, að kórónan verður ekki í ferðatöskunni þegar ég kem heim á mánudag." Nú verður Unnur Birna að ganga á bak orða sinna því kórónan góða verður svo sannarlega með í farteskinu þegar fegurðardrottningin snýr aftur heim.

Keppnin var hin glæsilegasta í alla staði en um 100 keppendur frá ýmsum þjóðlöndum tóku þátt í henni. Íslenskir áhorfendur sátu límdir við skjáinn og göptu af undrun þegar úrslitin voru kunn. Fegurðardrottningin sjálf var ekki minna hissa og sagðist alls ekki hafa búist við þessu. "Ég hélt þetta væri komið gott þegar ég var komin í sex manna úrslit og átti alls ekki von á að ná lengra," sagði fegurðardrottningin í samtali við NFS í gær.

Heiðar Jónsson lýsti keppninni á Skjá einum og var að vonum ánægður með árangur Unnar. "Ég átti reyndar alveg von á þessu og þegar það var ljóst að ungfrú Filippseyjar kæmist ekki í úrslit var ég viss um að Unnur myndi vinna," segir Heiðar og bætir því við að keppnin hafi verið mjög spennandi. "Ég veit ekki hvort fólk gerir sér grein fyrir því að þetta er gríðarlega vinsælt sjónvarpsefni og þar af leiðandi mikil landkynning. Fegurðarsamkeppnir hafa verið misvinsælar í gegnum tíðina en núna eru þær á hápunkti á heimsmælikvarða. Þótt áhuginn í Norður-Evrópu hafi minnkað þá er víða borin gríðarleg virðing fyrir keppninni og því á Unnur eflaust eftir að bera hróður Íslands víða. Titillinn gefur henni líka ótrúleg tækifæri. Hún mun ferðast um heiminn og sinna góðgerðarmálum," segir Heiðar sem er ekki í nokkrum vafa um hvers vegna heimsbyggðin valdi Unni.

"Hver sá sem hittir þessa stúlku kemst að því að hún á þennan titil svo sannarlega skilið. Um leið og þú kynnist henni þá gleymirðu hvað hún er falleg. Hún er svo góð og hlý og klár þannig að eftir klukkutíma viðkynningu þá skiptir engu hvort hún er sæt eða ekki," segir Heiðar.

Forseti Íslands, Ólafur Ragnar Grímsson, og kona hans, Dorrit Moussaieff, sendi Unni Birnu eftirfarandi heillaóskir: "Við óskum þér til hamingju með glæsilegan árangur. Þú ert landi og þjóð til sóma."