18 lög á 15 tungumálum

Úr vísnabók heimsins er komin út á vegum Rauða kross Íslands. Á henni syngja íslensk börn af ýmsum uppruna barnalög, þjóðlög og vísur frá 18 löndum á 15 tungumálum. Löndin 18 eru Albanía, Mexíkó, Kína, Japan, Sambía, Palestína, Pakistan, Rúmenía, Taíland, Víetnam, Bandaríkin, Írland, Ástralía, Perú, Frakkland, Serbía, Danmörk og Ísland.

Platan er unnin að frumkvæði Ellenar Kristjánsdóttur söngkonu sem stýrði framkvæmdinni og fann börnin í samvinnu við Rauða krossinn. Eyþór Gunnarsson, eiginmaður Ellenar, stýrði upptökum og lék á ýmis hljóðfæri en auk hans spila KK, Þorsteinn Einarsson, Pétur Grétarsson, Hjörleifur Valsson og Sigurður Flosason á plötunni.

Allir sem tóku þátt í gerð plötunnar gáfu vinnu sína og hönnunar- og framleiðslukostnaður er í algjöru lágmarki. Kveikjan að hugmyndinni var sú hugsun að börn eru alls staðar eins þegar þau fæðast en ytri aðstæður ráða því að þau búa við æði misjöfn kjör.

"Ellen langaði til að gera þetta. Hún hefur alltaf verið svolítið þannig þenkjandi og langar að láta gott af sér leiða," segir Eyþór Gunnarsson. Hann segir að verkefnið hafi tekið rúmt ár í vinnslu í hjáverkum. Mestur tími fór í að komast í samband við öll börnin og fóru þau samskipti fram í gegnum Alþjóðahúsið og Austurbæjarskóla, sem kennir íslensku fyrir börn af erlendum uppruna.

"Við reyndum að halda í einhvers konar þjóðleg einkenni og vildum alls ekki poppa þetta upp. Við vildum halda þessu eðlilegu og lágstemmdu," segir Eyþór um plötuna.

Söluverð er 1.499 kr. og rennur það óskipt til aðstoðar Rauða krossins við munaðarlaus börn í Afríkuríkinu Malaví.