Snorri hættir opinberu brölti

Heimspekingarnir Jón Proppé og Valur Antonsson, sem báðir hafa látið sig myndlist mjög varða, ætla að gera úttekt á Snorra Ásmundssyni myndlistarmanni í Nýlistasafninu í dag, spjalla við hann og efna til umræðna með þátttöku áhorfenda um stöðu nýlista á Íslandi.

"Ég er búinn að vera svo berskjaldaður," segir Snorri Ásmundsson listamaður, sem um þessar mundir gerir upp feril síðustu ára á yfirlitssýningu sinni í Nýlistasafninu. Hann hefur staðið í margvíslegu "brölti" á opinberum vettvangi, eins og hann orðar það sjálfur, boðið sig fram til borgarstjóra og forseta, selt aflátsbréf og látið krossfesta sig, svo fátt eitt sé nefnt.

"Maður hefur verið að gera sjálfan sig að opinberu listaverki, hálfgerðu fríki og kallað yfir sig alls konar áreiti í kjölfarið. Einhvern veginn fannst mér að ég þyrfti að kveðja þetta með þessari sýningu. Þetta er dýrmæt reynsla sem ég er með en nú ætla ég að taka svolítið annan pól í hæðina," segir Snorri, sem hefur tekið upp nýtt listamannsnafn og nefnir sig héðan í frá Znosso. "Þegar maður notar sjálfan sig svo mikið þá fer maður að rugla saman persónunni Snorra Ásmundssyni og listamannninum Snorra Ásmundssyni. Oft eru listamenn að koma sér upp alter ego en ef ég hefði gert það þá hefði enginn getað tekið mark á mér."