Aukatónleikar Tinganellis á Nasa

Það þurftu margir frá að hverfa þegar ítalsk-íslenski söngfuglinn og áttfaldur Ítalíumeistari í kappróðri hélt útgáfutónleika sína í Salnum í nóvember, í tilefni sólóplötu sinnar Volo Libero.

"Platan rennur út og ég er svo hrærður yfir móttökunum," segir Leone sem átti sér draum um sóló­plötu frá því að hann var lítill drengur í Napólí. Á Volo Libero eru frumsamdar lagasmíðar og textar Leones þar sem hann syngur rómantísk lög af stökum sjarma. Platan hefur slegið í gegn og er nú þriðja sending á leið til landsins, en á henni flytur hann einnig dúetta með Björgvini Halldórssyni, Jóhanni Friðgeiri og Regínu Ósk.

"Platan er tileinkuð konunni minni og sannri, eilífri ást," segir Leone sem vegna gífurlegrar eftirspurnar treður upp á aukatónleikum á Nasa annað kvöld, þann 13. desember klukkan 20.30, en þar munu stíga á stokk með honum þau Regína Ósk, Jóhann Friðgeir og Friðrik Ómar. Þar mun Leone ásamt frábærri hljómsveit flytja ítalskar perlur, jólalög og öll fallegu, nýju lögin sem stimplað hafa sig svo rækilega inn í hjörtu landsmanna.

Miðasala fer fram á www.2112.is, í verslunum Pennans Eymundssonar (Austurstræti og Smáralind) og í Eymundsson í Kringlunni.