Ísland hýsir evrópska jólatónleika

Í gærkvöldi voru stórtónleikar Frostrósa í Laugardalshöll. Ásóknin var það mikil að tónleikahaldarar neyddust til að bæta við aukatónleikum. Aðsóknin var ekkert síður minni á þá og eru þessir jólatónleikar því einhver mest sótti tónlistarviðburður Íslands.

Samúel Kristjánsson, framkvæmdastjóri útgáfufyrirtækisins 21 12, var að vonum ánægður með aðsóknin en þetta var í síðasta skipti sem Frostrósatónleikarnir eru haldnir í þessari mynd.

Fram undan eru miklar breytingar því á næsta ári stendur fyrirtækið hér á landi fyrir tónleikunum Eurapean Divas: Frostroses of Iceland haldnir. Þetta verða einir allra stærstu tónleikar sem haldnir hafa verið á Íslandi því fimm af þekktustu sönkonum álfunnar koma hingað eingöngu í þeim tilgangi að syngja á jólatónleikunum.

"Það verða fulltrúar frá hverju svæði Evrópu en við stefnum að því að koma einni íslenskri söngkonu með," segir Samúel og útilokar ekki að þekktir gestasöngvarar muni enn fremur leggja leið sína hingað til að taka þátt í jólagleðinni.

Samningaviðræður standa nú yfir við allar helstu sjónvarpsstöðvar Skandinavíu og Vestur-Evrópu og var Samúel mjög bjartsýnn á að samningum yrði landað á allra næstu dögum.

"Þetta er þriggja ára verkefni og verður hér árlega," útskýrir hann. "Þeir fyrstu verða teknir upp í einni af okkar glæsilegustu kirkjum sérstaklega fyrir sjónvarp og svo verða tónleikar fyrir almenning," útskýrir hann.

Þá segir hann að þeir séu í viðræðum við stórt evrópskt útgáfufyrirtæki um dreifingu á tónlistinni og mynddiskum en herlegheitin verða að sjálfsögðu gefin út um alla Evrópu. 21 12 fyrirtækið tekur miklum breytingum á næstunni og ljóst að verkefnum á eftir að fjölga og umfang þeirra verða meira.

"Það verður dótturfyrirtæki Fókus sem mun einbeita sér að útgáfu tónlistar," segir Samúel en móðurfélagið sér um stærri verkefni en fjögur verkefni eru að auki í burðarliðnum hjá þeim og má þar nefna stórtónleika og kvikmynd en verkefnin verða ekki bundin við Ísland.