Hvatt til bólusetningar

Hettusóttartilfellum fjölgaði verulega í nóvember, samkvæmt Farsóttarfréttum Landlæknisembættisins. Nítján greindust með hettusótt í mánuðinum. Í Farsóttafréttum fyrr á þessu ári var fjallað um hettusótt sem greinst hafði hér á landi á árinu 2005. Talið var að faraldurinn hefði náð hámarki í júlí og ágúst og myndi dvína seinni hluta ársins.

Nú hefur hins vegar komið í ljós að svo er ekki. Þeir einstaklingar sem einkum sýkjast eru þeir sem fæddir eru á árunum 1981 til og með 1985 en það eru þeir sem misstu af MMR-bólusetningunni sem hófst hjá átján mánaða gömlum börnum á árinu 1989 og hjá níu ára gömlum börnum 1994.

Sóttvarnalæknir hvetur fólk sem fæddist á árunum 1981 til og með 1985 að láta bólusetja sig. Fólk getur leitað til næstu heilsugæslustöðvar og verður bólusetningin þeim að kostnaðarlausu. Aukaverkanir af bólusetningunni eru sagðar óverulegar.