Síðdegisrokk

Hljómsveitirnar Jeff Who?, Jan Mayen og Brain Police munu troða upp í tvígang á Gauki á Stöng í kvöld. Fyrri tónleikarnir hefjast rétt eftir kl. 17 og þá verður ekkert aldurstakmark og aðgangseyrir verður 0 krónur.

Tilvalið fyrir unga fólkið að sjá þrjú af betri rokkböndum Íslands ókeypis svona í miðjum próflestrinum til þess að fá smá birtu í skammdegið. Um kvöldið verður svo allt gert vitlaust á Gauknum þegar þessi sömu þrjú bönd troða upp aftur. Þeir tónleikar munu hefjast þegar það fer að nálgast miðnætti og kostar 1000 krónur inn.

Jeff Who? hefur leikinn, síðan kemur Jan Mayen og loks Brain Police en hljómsveitin er nýkomin úr vel heppnaðri tónleikaferð um Evrópu. Jan Mayen-menn hafa setið sveittir við að semja efni á næstu plötu sína undanfarið og munu þeir leika eitthvað af nýja efninu á tónleikunum í bland við gamalt og gott. Jeff Who? sendi nýverið frá sér sína fyrstu plötu sem hefur fengið frábæra dóma og þá hitaði sveitin eftirminnilega upp fyrir Franz Ferdinand á tónleikum í Kaplakrika í sumar.