Gjörbreyttur tónlistarstíll

Fyrsta plata hljómsveitarinnar Nilfisk, Don"t Run After Your Own Apples, er komin út. Platan er níu laga og hefur verið í bígerð síðustu tvö ár. Að sögn Víðis Björnssonar gítarleikara eru bæði glæný lög og tveggja ára gömul lög á plötunni. Upptökur fóru fram í vor og kláruðust í haust.

"Það hefur verið sagt við okkur að þetta sé dans-gleði-bílskúrsrokk og ég held að það sé bara besta lýsingin á plötunni," segir Víðir. Hann viðurkennir að Nilfisk hafi tekið miklum breytingum síðan hún var stofnuð þann 10. mars 2003, en skömmu síðar hitaði hún upp fyrir Foo Fighters í Laugardalshöllinni.

"Hún hefur gjörsamlega breytt um tónlistarstíl, enda geturðu alveg heyrt það ef þú hlustar á plötuna. Við ákváðum að leyfa þessum gömlu lögum að vera með," segir hann. Lagið On Display af plötunni er til sölu á heimasíðunni Real Networks í Bretlandi sem tvær milljónir tónlistaráhugamanna skoða reglulega. Lagið hefur slegið í gegn á síðunni og er með fjórar stjörnur af fimm í einkunn, sem er sú hæsta á síðunni. Aðspurður segir Víðir að ýmislegt sé í pípunum varðandi frekari kynningu erlendis á næstunni.

Sveitin mun spila í Danmörku næsta sumar og ætlar síðan að halda tónleika í Wisconsin í Bandaríkjunum en krakkar þaðan heimsóttu einmitt Stokkseyri, heimabæ Nilfisk, í sumar á sama tíma og góðvinir sveitarinnar, Foo Figters, voru í heimsókn. Fleiri tónleikar í Bandaríkjunum eru fyrirhugaðir á sama tíma. Einnig mun Nilfisk líklega spila í Síberíu á næsta ári.

"Það er maður á Stokkseyri sem á tvinnaverksmiðju sem ætlar að reyna að koma okkur að þar. Við munum örugglega spila á einhverjum sveittum börum. Síðan er ýmislegt fleira á döfinni sem er ekki hægt að segja frá núna," segir Víðir, þögull sem gröfin.

Hann segir að Nilfisk sé ennþá í sambandi við Foo Fighters. Af og til fái þeir tölvupóst frá hljómsveitarmeðlimum og nýlega báðu þeir um Nilfisk-boli fyrir rótarana. Einnig fékk rótarinn Shawn sendan til sín harðfisk sem hann ku vera alveg brjálaður í.

Nýja platan verður síðan send út á næstu dögum. Þá geta Foo Fighters skorið úr um hvort Nilfisk hafi tekið einhverjum framförum síðan síðast. Nilfisk heldur sína fyrstu útgáfutónleika vegna plötunnar á Skuggabarnum á Stokkseyri á föstudag klukkan 18.00.

Síðar í mánuðinum verða síðan aðrir útgáfutónleikar í Reykjavík. Tónleikaferð um landið er svo fyrirhuguð í janúar.