Félagsmiðstöðvar fá gefins eintök

Rokksveitin Pan hefur í tilefni jólanna ákveðið að gefa plötu sína Virgins, sem kom út fyrr á árinu, öllum félagsmiðstöðvum á höfuðborgarsvæðinu. Þær eru um fjörutíu talsins.

"Mér flaug þetta í hug í seinustu viku," segir Björgvin Benediktsson, gítarleikari Pan, sem vinnur sjálfur í félagsmiðstöð í Hafnarfirði. "Unglingarnir eiga ekki alltaf auðveldast með að fá það sem þeir vilja og nú þar sem rokk er komið aftur í tísku er gaman að geta leyft þeim að njóta okkar tónlistar, ef þeir hafa áhuga á því," segir hann.

"Stundum langar kannski unglinga að kynnast betur tónlist ákveðinna hljómsveita en geta einungis nálgast brot af plötum þeirra á netinu. Því getur verið gott að geta skellt plötunni í tækið uppi í félagsmiðstöð og kynnst tónlistinni betur." Fyrstu eintökin voru nýverið afhent Óla Þór, forstöðumanni Versins í Hafnarfirði sem einnig er formaður Samfés. Platan Virgins er fyrsta plata Pan en sveitin spilar melódískt og framsækið rokk í anda Tool og Perfect Circle.