Íslenskir Stónsarar á Gauknum

Hinir íslensku Stónsarar koma fram á Gauki á Stöng á morgun fimmtudag. Tilefnið er útkoma nýrrar bókar um Rolling Stones í þýðingu Birgis Baldurssonar. Er sveitin skipuð einvalaliði en þýðandinn sjálfur mun lemja húðirnar.

"Þetta verður fallegt," sagði hann. "Það er smitandi ánægja milli hljómsveitameðlima," bætir hann við en sveitina skipa auk hans Björgvin Gíslason, Eðvarð Lárusson, Tómas Tómasson og Einar Rúnarsson en það er sjálfur Helgi Björns sem bregður sér í líki Mick Jagger. "Reyndar hefur honum ekki gefist tækifæri til að æfa með okkur en við rennum yfir dagskrána á fimmtudaginn," segir Birgir óhræddur en þetta er einmitt í ætt við ferlið hjá Rolling Stones sem æfa frekar lítið.

"Þetta felst ekki í að apa allt "orðrétt" upp eftir þeim heldur spila frekar í anda þeirra," segir Birgir. "Það getur enginn leikið á gítar eins og Keith en það er hægt að spila í anda hans." Birgir segir að Rolling Stones hafi haft mikil áhrif á rokktónlistina og ekkert síðri en fjórmenningarnir í Bítlunum.

"Þeir nálguðust tónsmíðina eins og djassinn og litu á lagasmiðar sem ramma og það væri síðan hægt að vinna eftir honum," útskýrir hann en Rolling Stones sóttu mikið í arf hinna svörtu blúsara, Motown og kántrítónlistina.

"Stones flytur rokk eins og það kemur af skepnunni sjálfri." Þýðandinn segist hafa skemmt sér konunglega yfir því að þýða bókina og margt hafi komið honum á óvart. Honum finnst þó ólíklegt að hann drekki einn Jack Daniels með engiferöli, morgunmat Keith Richards, áður en hann stígur á sviðið.

"Hann sagði reyndar eftir að hafa þurrkað sig upp af heróíni að allt annað væri barnaleikur," útskýrir Birgir en segist jafnframt þurfa á öllu sínu að halda ef ekki eigi að fara illa.