Allt í rugli hjá Britney

Þeir eru sennilega fáir almannatengslafulltrúarnir núna sem ráðleggja ungu frægu pari að taka upp raunveruleikaþátt um hveitibrauðsdagana sína. Nick Lachey og Jessica Simpson eru skilin og bendir allt til þess að Britney Spears verði brátt einstæð móðir.

Þrátt fyrir að hún sé nýbúinn að eignast barn er allt í kalda koli hjá henni og Kevin Federline samkvæmt breska blaðinu The Sun. Blaðið greinir einnig frá því að Spears hafi hent Federline út og látið draga rauða Ferrari-bifreið hans á brott. Britney mætti með soninn Sean Preston á Billboard-verðlaunin en Kevin elti hana þangað og skráði sig inn á sama hótel. Hann hringdi síðan stanslaust og varð þetta ónæði til þess að Spears hætti við að koma fram.

Samkvæmt blaðinu er poppdrottningin orðin langþreytt á sífelldu djammi eiginmannsins síns, sem elskar bílinn sinn jafn mikið og hana. Heimildarmaður blaðsins segir að Britney sé í öngum sínum yfir því hvernig komið sé fyrir sér en þrátt fyrir ungan aldur eigi hún nú að baki misheppnað hjónaband.