Nornatími á Norðurlöndum

JPV Útgáfa hefur gengið frá sölu á útgáfurétti sakamálasögunnar Tíma nornarinnar, eftir Árna Þórarinsson, til Danmerkur, Noregs, Svíþjóðar og Finnlands. Jóhann Páll Valdimarsson, útgefandi bókarinnar, segir útgefendur víða um heim hafa haft bókina til skoðunar undanfarið en þegar það fréttist að hún hefði hlotið tilnefningu til Íslensku bókmenntaverðlaunanna brugðust norrænir útgefendur skjótt við.

Fleiri samningar við útlenda útgefendur eru á viðræðu­stigi þannig að allt útlit er fyrir að Tími nornarinnar muni koma út í fleiri löndum áður en yfir lýkur. Það mun hafa vakið athygli þeirra útgefenda sem hafa gefið Tíma nornarinnar gaum að einungis tvær íslenskar glæpasögur hafi fengið tilnefningu til bókmenntaverðlaunanna, en Kleifarvatn eftir Arnald Indriðason var tilnefnd í fyrra.

Íslenskir gagnrýnendur hafa tekið Tíma nornarinnar vel og fyrsta prentun hennar er uppseld og önnur nýkomin. Tími nornarinnar er fjórða bók Árna um blaðamanninn Einar sem er lagið að róta sér í vandræði og leysa flókin sakamál. Að þessu sinni er Einar fluttur til Akureyrar og sinnir fréttaskrifum frá Norður- og Austurlandi og fyrr en varir er hann kominn á kaf í rannsókn tveggja morðmála og útistöður við handrukkara og eiturlyfjasala.