Biblía Gilzenegger frestast fram í janúar

Fyrsta bók Gilzenegger, Biblía fallega fólksins, mun að öllum líkindum frestast fram í janúar en hún átti upphaflega að koma út fyrir jólin hjá bókaútgáfunni Eddu. "Ég er búinn að skrifa bókina. En það var vitað allan tímann þegar við fórum í þetta að tíminn væri tæpur. Ég náði samt að kýla á þetta og klára bókina á þremur vikum," segir Gilzenegger, sem er nokkuð sama þótt bókin komi ekki út fyrir jólin.

"Ég er ekkert að stressa mig yfir þessu. Fólk þarf að byrja nýtt ár einhvern veginn og hvernig á fólk að byrja árið ef það er ekki með biblíunni? Ég er á því að það sé jafnvel gáfulegra því þá geta þeir sem hafa fengið lélegar bækur fyrir jólin skipt þeim fyrir þessa," segir hann. Að sögn Gilzenegger fjallar stærsti kaflinn í bókinni um líkamsrækt. Þar fer hann í æfingar og setur upp áætlanir. "Þetta vantar fyrir alla sem eru að byrja, upplýsingar um hvernig á að koma sér af stað. Síðan er kafli um hvernig á að eiga við dyraverði og svo hjálpa ég strákunum með dömurnar."

Hann segir að bókin hafi eiginlega komið af sjálfu sér. "Ég þurfti að setja kúnnana í Sporthúsinu á "hold" en heil bók á þremur vikum er ekki slæmt. Þetta er samt bara fyrsta bókin af mörgum. Þetta er bara fyrsta kvikindið."