Svanasöngur í kvöld

Þeir Kristinn Sigmundsson söngvari og Jónas Ingimundarson píanóleikari halda tónleika í Salnum í kvöld og flytja þar síðasta lagaflokk Schuberts "Schwanengesang" en hann hefur að geyma mörg af hans bestu sönglögum og er þá mikið sagt því af nægu er að taka.

Þetta verk fluttu þeir Kristinn og Jónas fyrir nokkrum árum og gáfu út á geisladiski sem nú er uppseldur. Tónleikarnir marka upphaf Ljóðaakademíu Salarins en þeir Kristinn og Jónas verða með námskeið í túlkun sönglaga fyrir söngvara á miðvikudag og fimmtudag í Salnum. Þetta er í annað sinn sem þeir gefa kost á slíku námskeiði undir heitinu "Ljóðaakademía Salarins".

Gert er ráð fyrir allt að tíu virkum þátttakendum og áheyrendum í sal á meðan húsrúm leyfir. Áheyrn að námskeiðinu er ókeypis og allir velkomnir. Námskeiðinu lýkur með tónleikum virkra þátttakenda á föstudagskvöldið þar sem aðgangur verður sömuleiðis ókeypis.