Syngur Brahms í hádeginu

Hólmfríður Jóhannesdóttir mezzósóran syngur ljóð eftir Johannes Brahms á hádegistónleikum í Listasafni Íslands í dag. Með henni leikur Gerrit Schuil á píanó. "Brahms er svolítið krefjandi og maður þarf að koma með djúpa túlkun til að syngja hann," segir Hólmfríður, sem ætlar að syngja bæði Sígaunaljóðin og fleiri ljóð eftir Brahms.

"Hann er hárómantískur og ofsalega gaman að syngja hann." Hólmfríður er einsöngvari og söngkennari að mennt, var sex ár við nám í Vínarborg, hélt síðan til Mílanó þar sem hún hélt áfram námi en fluttist heim til Íslands fyrir nokkrum árum. Fyrir tveimur árum eignaðist hún lítinn dreng og hefur því ekki komið mikið fram, en er að fara á kreik aftur um þessar mundir.

"Ég var ekkert endilega að hugsa um að koma heim, en gerði það samt og hef verið að syngja mikið við brúðkaup og jarðarfarir," segir Hólmfríður, sem einnig hefur komið fram á tónleikum í Berlín, Finnlandi og víðar. "Ég hef ekkert verið í óperum, einbeiti mér alveg að ljóðum og óratóríum."

Tónleikar þeirra Hólmfríðar og Gerrits Schuil í Listasafninu hefjast klukkan 12.15.