Rólegur og ferskur

Hvernig er stemmningin? Andrúmsloftið er blandað rólegum undirtón og snert af ferskleika sem maður verður var við um leið og gengið er inn. Litur veggjanna setur tóninn fyrir þá ímynd sem staðurinn býður upp á. Dökkfjólubláir veggirnir og dimm birtan ásamt kertum í tugatali gefur fyrirheit um rómantískar og afslappaðar stundir.

Hægt er að mæla sérstaklega með sófasettunum baka til ef fólk er á hægu nótunum og vill njóta meira næðis. Nýlega var anddyri veitingastaðarins stækkað svo að mögulega verður hægt að auka fjölda borða.

Matseðillinn: Hægt er að fá nánast allt sem hugurinn girnist. Meðal annars er boðið upp á svokallaðar Himnadrumbur sem eru kjúklingaleggir með Jalapeno og sósu úr sólþurrkuðum tómötum.

Einnig er hægt að fá hefðbundna kjötrétti svo sem piparsteik og lambakjöt. Þá er boðið upp á kræklinga og lax.

Vinsælast: Þar sem nýlega var skipt um matseðil er ekki komin mikil reynsla á vinsælasta rétt hússins.

Yfirþjónninn mælir þó með Himnadrumbunum sem rétt sem verðugt er að bragða á.

Stefnt verður að því að hafa svokallaðan Boost-bar í hádeginu þar sem menn geta skellt í sig heilsudrykkjum og annarri hollustu.

Réttir hússins: Rétt er að minnast á Sjávarréttaveislu Angelo sem er með glæsilegasta móti. Þar er boðið upp á hvítlauksgrillaðan lax, pipraða ýsu ásamt humarhölum, risarækjum og grænmeti sem er borið fram með hvítvíni hússins.

Annar sérréttur Angelo er hvalkjöt í whiskey-sósu með eggeldin og kartöflum.