Kenna hvernig á að syngja ljóð

Þeir Kristinn Sigmundsson söngvari og Jónas Ingimundarson píanóleikari halda námskeið í túlkun sönglaga dagana 6. til 9. desember í Salnum í Kópavogi. Gert er ráð fyrir allt að tíu virkum þátttakendum sem fá að njóta leiðsagnar þeirra Kristins og Jónasar í túlkun íslenskra sönglaga og þýskra ljóðasöngva.

Námskeiðið hefst með ljóðatónleikum þeirra Kristins og Jónasar þriðjudagskvöldið 6. desember þar sem þeir flytja ljóðaflokkinn Schwanengesang eftir Schubert. Námskeiðið sjálft stendur síðan yfir miðvikudaginn og fimmtudaginn kl. 9.30 til 16.30, og loks lýkur því með tónleikum þátttakenda föstudagskvöldið 9. desember.

Öllum er frjálst að fylgjast með námskeiðinu og er aðgangur ókeypis. Sömuleiðis er ókeypis aðgangur að tónleikum þátttakenda á föstudagskvöldinu. Verð fyrir virka þátttöku á námskeiðinu, með tilsögn og áheyrn, kostar hins vegar 15.000 krónur og umsóknarfrestur er til 5. desember.

Námskeiðið er haldið á vegum Ljóðaakademíu Salarins, sem Kristinn hafði frumkvæði að því að stofna síðastliðið vor. Þá héldu þeir Jónas meistaranámskeið í Salnum með svipuðu fyrirkomulagi og nú fyrir unga söngvara og langt komna söngnemendur.