Sögin snýr aftur

Hryllingsmyndir hafa á undanförnum árum verið ryðja sér til rúms á ný eftir að hafa legið í dvala um nokkurt skeið. Kvikmyndaverin höfðu gleymt því að hryllingsmyndir verða að vera hráar, ódýrar og helst illa leiknar svo þær dragi að sér ákafa fylgismenn þessarar kvikmyndargerðar.

Ein af þeim kvikmyndum sem hóf þessar myndir til vegs og virðingar á ný var kvikmyndin Saw sem sló í gegn meðal hryllingsmyndaaðdáenda í fyrra og nú er að sjálfsögðu komið framhald. Að hætti góðra hryllingsmynda er Saw II bæði ódýr og hrá. Hún kostaði einungis fjórar milljónir dollara en hefur nú þegar þénað 85 milljónir.

Hinn andstyggilegi Jigsaw er mættur aftur og nú hefur lögreglumaðurinn Eric Matthews komist á snoðir um illvirki hans. Reyndar er eltingaleikurinn hluti af ógeðfelldri áætlun þessa viðurstyggilega fjöldamorðingja því átta manneskjur eru nú þegar að berjast fyrir lífi sínu. Það sem Matthews veit ekki er að hann er hluti af heildarmyndinni og Jigsaw ætlar sér að gera hann hluta af leiknum.

Það er fyrrum New Kids on the Block stjarnan Donnie Wahlberg sem fer með aðalhlutverkið í myndinni en hann er litli bróðir leikarans Mark Wahlberg. Það þarf varla að taka það fram að Saw II er stranglega bönnuð innan sextán ára.