Orðabók veltir Arnaldi

Stóra orðabókin um íslenska málnotkun, eftir Jón Hilmar Jónsson, trónir nú á toppi aðallista sölubóka hjá Pennanum, Máli og menningu og Eymundsson og hefur þar með velt sjálfum Arnaldi Indriðasyni sem er kominn í annað sætið með Vetrarborgina. Arnaldur heldur hins vegar sínu á sölulista innbundinna skáldverka og er í fyrsta sætinu þar.

"Það hljóta að teljast stórtíðindi að stórvirki eins og Stóra íslenska orðabókin um íslenska málnotkun fari rakleitt í 1. sæti metsölulistans eftir aðeins eina viku í sölu," segir Jóhann Páll Valdimarsson útgefandi hjá JPV.

"Hér hjálpast að hversu vel bókin mælist fyrir enda ómetanlegt hjálpartæki allra sem vilja styrkja stöðu sína og vanda mál sitt í ræðu og riti. Þetta er stærsta orðabók sem út hefur komið um margra áratuga skeið. Verð bókarinnar er líka lægra en nokkru sinni hefur sést á öðru eins stórvirki sem hefur verið 17 ár í vinnslu. Bókin kostar um það bil helming af því verði sem eðlilegt mætti teljast."