Kvöldsögur úr Stóra eplinu

Jólamyndin Noel segir sögu fjögurra ólíkra persóna í stórborginni New York um það leyti sem jólahátíðin er að ganga í garð. Þeir sem þekkja til segja stórborgina engu líka þegar hátíð ljóss og friðar er í hámarki. Bókaútgefandanum Rose gengur allt í haginn í vinnunni en einkalífið er í molum.

Hún er nýfráskilin og á erfitt með að líta við karlmönnum. Systir hennar talar ekki við hana og hún þarf því að sjá ein um Alzheimer-veika móður sína. Það stefnir því í einmanaleg jól hjá henni.

Mike Riley er lögregluþjónn sem telur sig vera í hamingjusömu sambandi við fegurðardísina Ninu. Hann er hins vegar sjúklega afbrýðisamur út í alla karlmenn sem gefa henni auga og þetta neyðir stúlkuna til að endurskoða hug sinn til hans.

Fjórða söguhetjan er síðan Jules Calvert, sem er glaumgosi af bestu gerð en langar til endurupplifa jólastemninguna frá fyrri tíð. Það er Chazz Palminteri sem leikstýrir þessari rómantísku mynd en í aðalhlutverkum eru Susan Sarandon, Penelope Cruz og Paul Walker.