Bótaskylda Vega­gerð­ar viðurkennd

Hæstiréttur hefur viðurkennt bótaskyldu Vega­gerð­ar ríkis­ins við Íslenska aðal­verk­taka og erlenda verk­taka­fyrir­­tækið NCC Inter­nat­ional vegna þess að hætt var við gerð Héðins­fjarðarganga sumarið 2003. Ríkisstjórnin hafði þá samþykkt að fresta framkvæmd verksins vegna þensluástands sem í uppsiglingu væri í þjóðfélaginu og því fékk Vegagerðin ekki peninga til verksins og tilkynnti bjóðendum það bréfleiðis.

Munurinn á tilboði verktakanna og kostnaðaráætlun verksins er um 190 milljónir króna, en samkvæmt heimildum blaðsins verður bótakrafa verktakanna vel yfir þeirri upphæð.

Dómur Hæstaréttar féll 17. þessa mánaðar og hafa verktakafyrirtækin enn ekki farið fram á viðræður við Vegagerðina vegna hans. Jón Rögnvaldsson vegamálastjóri segir því á þessu stigi ekki hægt að meta hverjar mögulegar bætur kynnu að verða.

"Það var viðurkennd skaðabótaskylda út af því að ekki hafi verið nógu frambærilegar ástæður til að hætta við útboðið. Að vísu er tekið fram í dómsorðinu að það liggi við að Vegagerðin sé ekki aðili másins. Dómurinn velur samt sem áður að vísa málinu ekki frá á þeim grunni, því eftir sem áður snýr þetta allt að ríkinu. En Vegagerðin er náttúrlega ekki ákvörðunaraðili í málinu."

Vegamálastjóri segir mögulegar bætur snúa að því fyrirtæki sem hagkvæmast hafi boðið. "Þeir sem buðu lægsta upphæð voru fyrirtækin sem höfðuðu málið, en hvort það tilboð var endilega hagkvæmast get ég ekki svarað á þessu stigi," segir hann og telur ekki ólíklegt að málið endi á borði dómstóla til úrlausnar.

"Fyrst þyrftu þá væntanlega að fara fram einhverjar viðræður milli aðila, en eftir þeim hefur ekki enn verið óskað." Jón Rögnvaldsson segir ákaflega sjaldgæft að hætt sé við útboð líkt og raunin hafi orðið með Héðinsfjarðargöng.

"Við höfum í því ákaflega litla reynslu. Á sínum tíma voru hins vegar í gangi viðræður við Aðalverktaka, fyrir hönd þessara aðila, varðandi hugsanlega endurgreiðslu á kostnaði við tilboðsgerðina. Þær viðræður gufuðu svo einhvern vegin upp." Lögmaður Íslenskra aðalverktaka og NCC International hefur málið á sinni könnu og mun þess að vænta innan tíðar að farið verði fram á viðræður við Vegagerðina.

Auk þess að viðurkenna bótarétt Aðalverktaka og NCC gerði Hæstiréttur Vegagerðinni að greiða þeim 1,8 milljónir króna í málskostnað bæði fyrir héraði og í Hæstarétti.