Feigðarflan í Grænu húsi

Bókaforlagið Græna húsið heldur sína fyrstu útgáfuhátíð með pomp og prakt á Súfistanum í kvöld og verða þar þrjár fyrstu bækur forlagsins kynntar. "Það hefur verið draumur í nokkurn tíma hjá okkur hjónunum að stofna eigið forlag," segir Rúnar Helgi Vignisson, rithöfundur og annar eigandi Græna hússins.

Rúnar hefur bæði skrifað og þýtt verk sem hafa komið út hjá Bjarti og JPV. "Það hefur vakið athygli að ég skyldi stofna mitt eigið forlag en ég vildi skapa nýjan farveg fyrir það sem mig langar að skrifa og það sem mig langar að þýða. Ég geri líka ráð fyrir að gefa út bækur eftir aðra." Fyrstu bækur forlagsins eru skáldsagan Feigðarflan eftir Rúnar sjálfan, barnabókin Silfurvængur og Þetta snýst ekki um hjólið, sem fjallar um hjólreiðakappann Neil Armstrong.

Feigðarflan er sjötta skáldverk Rúnars og fjallar um uppgjafarskáld sem hefur fengið leið á lífinu og leggur í leit að heppilegum stað til að stytta sér aldur. Úr því verður vegasaga þar sem maðurinn er aldrei sáttur við þá staði sem hann finnur og eftir því sem líður á ferðalagið breytist sýn hans á lífið. "Kannski er það vegna þess að ég er orðinn miðaldra og sýn mín á lífið er að breytast," segir Rúnar um yrkisefnið.

"En þetta er fyrst og fremst samræða við tíðarandann þar sem svo mikil áhersla er lögð á fjárhagslega velgengni." Auk bókakynninganna verður boðið upp á tónlistaratriði þar sem Rúnar Þórisson gítarleikari kynnir verk af sinni fyrstu sólóplötu, Ósögð orð og ekkert meir. Rúnar samdi á sínum tíma lagið Mér finnst rigningin góð, en þar kemur fyrir Græna húsið svokallaða á Ísafirði. "Það hús áttu afi minn og amma lengi vel og eftir því er forlagið nefnt," segir Rúnar Helgi. "Auk þess er Rúnar mágur minn svo þetta ber allt að sama brunni."