Dýrari og ótraustari nettenging Farice

Flutningsgjöld um Farice-sæstrenginn eru allt að ellefu til átján sinnum hærri en flutningsgjöld í nágrannalöndum Íslands. Guðmundur Gunnarsson, framkvæmdastjóri Farice, segir þann samanburð þó ekki sanngjarnan miðað við stærð markaðar hér á landi. Við erum hér ein þjóð úti í hafi og erum ein að borga undir þetta allt saman, segir Guðmundur. London og New York eru til dæmis milljónasamfélög sem eru að nota sams konar þjónustu í miklu meiri mæli.

Farice er annar tveggja strengja sem liggja til Íslands. Hinn strengurinn er CANTAT þrír. Sá strengur er orðinn ellefu ára gamall og flutningsgeta hans er mun minni en hjá Farice en Guðmundur segir Farice ekki hafa séð sér fært að bjóða jafn lágt verð og gert er hjá CANTAT. Verðskráin endurspeglar kostnað við að reka strenginn og borga niður fjárfestinguna á bakvið hann. Við erum ekki að taka inn hagnað og hátt verð liggur alls ekki í álagningu af okkar hálfu, segir Guðmundur.

Guðmundur segir ef eftirspurn yrði eftir flutningsgetu ykist myndi það leiða til verðlækkunar. Að undanförnu hafa hátæknifyrirtæki flutt starfsemi sína úr landi. Ástæður þess eru margvíslegar en ein sú helsta er hátt gengi krónunnar. Viðskiptaumhverfi á Íslandi er einnig óhagstætt að mörgu öðru leyti, meðal annars vegna hás verðs flutningskostnaðar, lítillar flutningsgetu sæstrengjanna og skorts á öryggi þeirra þar sem samband rofnar oftar en eðlilegt þykir.

"Ljóst er að til þess að ýmiss konar viðskipti geti dafnað hér á landi og hingað komi viðskiptaélög með nýja starfsemi verður eitthvað að gerast í þessari verðlagningu og auknu öryggi," segir Guðmundur og tekur undir að ákveðin pattstaða ríki í þessum málum.

Farice hafi ekki möguleika á að lækka flutningsgjöldin nema fá fleiri fyrirtæki í viðskipti við sig en fyrirtækjum þyki verðlagning há.

"Svo eru hátæknifyrirtækin farin að flýja land vegna hás gengis krónunnar og það er mjög vond staða," segir Guðmundur.

Síðastliðin tvö ár hafa erlend fyrirtæki sýnt áhuga á því að koma hingað með nýja starfsemi en það sem fælir þau frá er há flutningsgjöld og að öryggi Farice hefur ekki verið nóg. Það ætti að vera hægt að laga þetta. Ríkið hefur stutt ágætlega við þetta dæmi hingað til og það verður engin breyting til batnaðar nema með samstarfi ríkis og atvinnulífsins.