Ein skemmtilegasta tónleikasveitin

 Rokkdúettinn The White Stripes, sem heldur tónleika í Laugardagshöll á sunnudagskvöld, þykir ein skemmtilegasta tónleikasveit samtímans. Freyr Bjarnason leit yfir feril sveitarinnar.

Sveitin var stofnuð í Detroit árið 1997 af þeim Jack White og Meg White. Fyrsta plata sveitarinnar, samnefnd henni, kom út 1999 og vakti mikla athygli. Í kjölfarið fylgdu plöturnar De Stijl, White Blood Sells, Elephant og nú síðast Get Behind Me Satan, sem er sú fimmta í röðinni. Á meðal vinsælustu laga The White Stripes til þessa eru Seven Nation Army, I Just Don"t Know What To Do With My Self og Fell in Love With a Girl.

Þau Jack og Meg stofnuðu sveitina með það í hyggju að búa til einfalda rokktónlist. Fyrsta platan var undir miklum blúsáhrifum en með árunum hafa þau áhrif minnkað aðeins, þó svo að blúsinn sé enn meginuppstaðan í lagasmíðunum.

Vinsældir sveitarinnar hafa aukist með hverri plötunni og nú er svo komið að hún er orðin ein sú stærsta í rokkinu, þrátt fyrir sérstöðu sína.

The White Stripes er óvenjuleg að því leyti að enginn bassaleikari er í sveitinni, heldur er aðeins notast við trommur og gítar. Naumhyggjan er í fyrirrúmi þar sem mest áhersla er lögð á hið hráa og kraftmikla. Til að fanga þann rokkhljóm hefur sveitin tekið plötur sínar upp á örskömmum tíma og var til að mynda Get Behind Me Satan tekin upp á aðeins tveimur vikum síðastliðið vor.

The White Stripes hefur einnig vakið athygli fyrir rauða og hvíta litinn sem hefur einkennt útlit sveitarinnar allt frá byrjun.

Söngvarinn og gítarleikarinn Jack White mun dvelja hér á landi frá laugardegi til mánudags en Meg verður lengur og fer af landi brott um miðja næstu viku. Uppselt er í stúku á tónleikana en nokkrir miðar eru enn eftir í stæði.