Nylon tekur Rolling Stones lag

Stelpurnar í Nylon fagna útkomu nýjustu afurðar sinnar, Góðir hlutir, í Loftkastalanum klukkan fjögur í dag. Sveitin hefur á rúmu ári eignast stóran aðdáendahóp og platan náði nýverið efsta sæti tónlistans og platan er uppseld hjá útgefanda.

"Þetta gengur alveg frábærlega," segir Steinunn Kamilla Sigurðardóttir af sinni alkunnri hógværð en stúlkurnar voru að máta föt hjá Oni sem þær verða í á tónleikunum. "Það gengur líka mjög vel," segir hún og hlær. Stelpurnar munu þó ekki eingöngu syngja fyrir aðdáendur sína því fjölmiðlafólk frá Bretlandi kemur til með að vera á tónleikunum auk tökuliðs frá enskum sjónvarpsþætti. Steinunn sagði stelpurnar þó fjarri því að vera eitthvað hræddar við þetta. Þær ætluðu að halda sér á jörðinni og tæku því bærist opnum örmum.

"Kannski heppnast allt og kannski floppar það," segir Steinunn. "Hvað sem verður þá erum við mjög ánægðar yfir því að vera komin þangað sem við erum í dag," bætir hún við og segir þær stöllur taka öllu umstanginu með stökustu ró.

Ný smáskífa fer í spilun á Englandi í janúar en það er endurútgáfa af Rolling Stones laginu Have you seen your mother baby. Heimildir Fréttablaðsins herma að lagið hafi mælst vel fyrir en þar kveði við algjörlega nýjan tón hjá stúlkunum og jafnvel stúlknasveitum yfirhöfuð. Steinunn segist ekki vera hrædd við að útgáfa þeirra eigi eftir að styggja hina fjölmörgu Stones aðdáendur.

"Við erum ekki í þessu til þess að pirra neinn," segir hún og tekur jafnframt undir það að þessi hljómur sé alveg nýr af nálinni. "Þetta er stutt, öðruvísi og pínulítið gamaldags," segir hún.