Tuttugu milljörðum meiri sala

Heildarverðmæti seldra framleiðsluvara var 302 milljarðar á síðasta ári, sem er 20 milljörðum króna meira en árið áður og sjö prósenta aukning frá ári til árs, samkvæmt nýjum tölum frá Hagstofu Íslands.

Verðmæti seldrar framleiðslu jókst í þrettán atvinnugreinum af sautján og var hlutfallslega mest í framleiðslu og viðhaldi á lækninga- og rannsóknartækjum, þar sem hún jókst um nær 50 prósent. Þegar litið er á hlutdeild einstakra atvinnugreina í heildarverðmætum seldrar framleiðslu á síðasta ári má sjá að matvæla- og drykkjarvöruframleiðsla á langstærstu hlutdeildina eða um 55 prósent.

Verðmæti þessa hluta nam um 166 milljörðum króna en þar af eru fiskafurðir um 113 milljarðar. Samdráttur var mestur í fata- og leðuriðnaði en verðmæti seldrar framleiðslu fór úr 900 milljónum í 700 milljónir króna á tímabilinu, og minnkaði því um tæp 15 prósent.