Rúmlega 30 lögreglumenn særðust

Verstu óeirðir í áraraðir brutust út í Belfast á Norður-Írlandi í gær og stóðu fram undir morgun. Á fjórða tug lögreglumanna særðist þegar mótmælendur í göngu Óraníureglunnar köstuðu í þá múrsteinum og heimatilbúnum bensínsprengjum og kveiktu í bílum og byggingum. Óraníureglan er elsta og öflugasta hreyfing þeirra Norður-Íra sem eru mótmælendatrúar og vilja hafa sem sterkust tengsl við Bretland. Á hverju hausti marsera Óraníumenn um götur Belfastborgar til að minnast sigurs Vilhjálms af Óraníu á kaþólska konunginum Jakobi öðrum í orrustu á sautjándu öld. Kaþólikkar eru því ekki sérlega hrifnir að þessum göngum og vilja ekki sjá þær í sínum hverfum. Nokkuð gott samkomulag hefur verið um þær síðustu árin eftir að sérstök bresk göngunefnd var skipuð árið 1997 til að hafa umsjón með göngunum. Í gær varð hins vegar allt vitlaust þegar lögreglumenn hugðust koma í veg fyrir að Óraníumenn þrömmuðu í gegnum Springfieldhverfið sem er rammkaþólskt. Átökin breiddust út um borgina og áttu tvö þúsund lögreglumenn og hermenn sem kallaðir voru til í mestu vandræðum með að ná stjórn á borginni á ný. Mótmælendur köstuðu heimatilbúnum sprengjum og múrsteinum í þá og til skotbardaga kom á að minnsta kosti einum stað. Bílum var stolið í tugatali og þeir brenndir og notaðir í götuvirki. Í norðurhluta Belfast var kveikt í byggingum líka og stóðu átökin fram undir morgun. Talsmenn lögreglunnar segja mótmælendur bera ábyrgð á því hversu alvarlegt ástandið varð, en Óraníumenn saka lögregluna hins vegar um óþarfa hörku og ofbeldi en hún sprautaði vatni yfir mótmælendur og skaut á þá plastkúlum. Ekki er vitað um fjölda særðra mótmælenda en vitað var af einum sem var lagður inn með skotsár.