Slys við Kárahnjúka

Erlendur starfsmaður við Kárahnjúka liggur á gjörgæsludeild Fjórungssjúkrahússins á Akureyri eftir að dráttarvír slóst utan í hann í gærkvöldi. Hann er þó talinn hafa sloppið ótrúlega vel og verður útskrifaður af gjörgæslu í dag, að sögn læknis á Akureyri. Slysið varð við neðri enda stíflustæðisins í Hafrahvammagljúfri þegar jarðýta var að draga vörubíl. Hlé hafði verið gert á verkinu og var verið að lagfæra festingu dráttarvírsins. Samkvæmt upplýsingum lögreglunnar á Egilsstöðum strekktist þá á vírnum af einhverjum orsökum. Hann losnaði og slóst utan í manninn sem missti við það meðvitund. Læknir og sjúkralið við Kárahnjúka hlúðu að hinum slasaða sem komst fljótt til meðvitundar á ný en hann var síðan fluttur til Akureyrar í nótt.