Ósáttur við hærri gjöld

Ágúst Einarsson, prófessor við viðskiptafræðiskor Háskóla Íslands, gagnrýnir harðlega fyrirætlanir þær sem fram koma í fjárlagafrumvarpi næsta árs um að skrásetningargjöld við háskólann hækki í 45 þúsund krónur. Gjöldin eru nú 32.500 krónur. "Þarna er verið að tala um næstum því 40 prósenta hækkun," segir Ágúst og telur að þarna sé verið að skapa mikinn óróa og óánægju meðal nemenda fyrir lítinn ávinning. "Þetta á ekki að gefa nema um 100 milljónir, sem er náttúrlega bara brot í rekstri skólans," segir hann og bendir á að háskólinn eigi milljarða í hlutabréfum í Eimskipafélaginu sem sáralítið hafi fengist fyrir. "Þarna er greinilega verið að lauma inn skólagjöldum í bakdyramegin inn í grunnámið. Mér finnst að menn eigi þá bara að kalla hlutina sínum réttu nöfnum."