Sex stórfyrirtæki hafa sent nefnd

Sex erlend stórfyrirtæki hafa sent sendinefndir hingað til lands á þessu ári til að kanna kosti þess að hefja hér stóriðju. Fimm þeirra áforma að reisa álver en eitt leitar að lóð undir manganverksmiðju. Hátt álverð allt þetta ár og spár um stöðuga aukningu álnotkunar í heiminum á næstu árum eiga vafalaust þátt í að skýra mikinn áhuga erlendra álfyrirtækja á Íslandi. Listi yfir þau fyrirtæki sem sent hafa sendinefndir á þessu ári til að skoða stóriðjukosti á Íslandi segir sína sögu. Fulltrúar Rio Tinto Zink funduðu í Reykjavík í marsmánuði með iðnaðarráðuneyti og Landsvirkjun um álver, sendinefnd Rusal heimsótti Eyjafjörð og Þingeyjarsýslur í apríl en þetta rússneska félag er þriðji mesti álframleiðandi heims, og fyrirtækið BHP-Billiton hefur sent tvær sendinefndir til Íslands á þessu ári, í maí og nú í byrjun október, og heimsóttu þær Eyjafjörð og Þingeyjarsýslur í bæði skiptin. Brasilískt málmfyrirtæki, CVRD, fundaði með fulltrúum stjórnvalda í Reykjavík í júní um möguleika á að reisa manganverksmiðju hér á landi. Sendinefnd á vegum Alcoa, sem reisir nú álver á Reyðarfirði, fór í Skagafjörð, Eyjafjörð og Þingeyjarsýslur í júlí og skoðaði mögulegar álverslóðir á Norðurlandi. Og Century Aluminum, sem nýlega eignaðist Norðurál, sendi menn út af örkinni í september til viðræðna við heimamenn í Eyjafirði og Þingeyjarsýslum. Valgerður Sverrisdóttir iðnaðarráðherra hefur lýst þeirri stefnu sinni að næsta stóriðja skuli rísa á Norðurlandi í framhaldi af uppbyggingunni á Austurlandi. Ólíkt því sem gerðist hjá Austfirðingum, sem sameinuðust um að bjóða fram Reyðarfjörð undir álver, er kapphlaup hafið milli héraða á Norðurlandi um hvar skuli staðsetja álver. Atvinnuþróunarfélag Eyjafjarðar býður fram lóð á Dysnesi, skammt frá Hjalteyri, en Atvinnuþróunarfélag Þingeyinga býður fram lóð rétt norðan Húsavíkur. Þá hafa Skagfirðingar blandað sér inn í umræðuna með stóriðjulóð sunnan Kolkuóss. Ágreiningur er hins vegar innan meirihluta Sjálfstæðismanna og Vinstri-grænna í sveitarstjórn Skagafjarðar um afstöðu til stóriðju og virkjana í héraðinu og hefur hann leitt til þess að meirihlutasamstarfið er í uppnámi.