Nemendur fá ekki greiddar bætur

Nemendur í Menntaskólanum á Ísafirði sem búsettir eru á heimavist skólans fá ekki greiddar húsaleigubætur, þó svo að lögheimili þeirra séu víðs fjarri skólanum. Síðastliðið sumar hækkaði húsaleiga á heimavistinni úr 16 þúsund krónum á önn upp í 18 þúsund krónur á mánuði. Þá sagði Ólína Þorvarðardóttir, skólameistari Menntaskólans á Ísafirði, að kjaraskerðing nemenda yrði lítil því þeir gætu fengið greiddar húsaleigubætur á móti. Þeir nemendur sem eiga lögheimili í byggðalögum sem nú heyra undir Ísafjarðarbæ fá hins vegar ekki greiddar húsaleigubætur úr bæjarsjóði, þó svo að þeim sé ekki kleift að sækja skólann frá sínu byggðarlagi vegna fjarlægðar. Ólína sagði í samtali við Fréttablaðið að þetta hefði komið skólayfirvöldum mjög á óvart. "Það á ekki að skipta máli hvort heimabyggðin sé innan sveitarfélagsins. Það er fjarlægðin sem á að skipta máli, eins við úthlutun námsstyrkja, og í mínum huga er þetta spurning um jafnræði," segir Ólína. Hún segir skólann hafa komið til móts við nemendurna sem um ræðir og veiti þeim afslátt af húsaleigunni sem nemur húsaleigubótum þar til málið leysist.