Guggan máluð í felulitum

Ísfirsku útgerðarfeðgarnir Ásgeir Gubjartssson og Guðbjartur Ásgeirsson ætla að mála nýjustu Gugguna sína í felulitum, eins og vestfirskir smábátasjómenn orða það. Þetta verður níunda Guðbjörgin sem Ásgeir eignast á 48 ára útgerðarferli og hafa þær allar verið gular, meðal annars risatogarinn Guðbjörg ÍS sem seld var Samherja á tíunda áratugnum. Síðan hafa feðgarnir gert út litla báta undir sama nafni og gælunafninu Guggan og sú snýjasta, sem er í smíðum og af gerðinni Cleopatra, verður hvít - nokkuð sem þykir tíðindum sæta. Ásgeir segir í viðtali við Bæjarins besta að það sé gert til að hverfa inn í fjöldann en fréttastofan hefur fyrir því heimildir að þeir sem ekki eru jafn afburðafisknir og feðgarnir eigi það til að elta þá á miðunum í von um góðan afla. Guli lilturinn hefur þá auðveldað þeim eftirförina. Eftir að stóra Guggan var seld og feðgarnir fóru að gera út smábáta hafa þeir farið stækkandi með hverjum nýjum bát og verður sú nýjasta heldur stærri og aflmeiri en sú sem þeir róa nú, enda hafa þeir bætt við sig 50 tonna kvóta af ýsu og steinbít í tilefni þess.