Allt í lagi í stað „okey"

Silja Aðalsteinsdóttir hlaut verðlaun Jónasar Hallgrímssonar í dag, á Degi íslenskrar tungu. Og Pétur Pétursson þulur færði þjóðinni gjöf í tilefni dagsins. Hann ætlar ásamt fleirum að heimsækja leikskóla og kenna börnum að segja „allt í lagi" í stað „ókei". Þessi dagur er hátíðisdagur hjá áhugafólki um íslenskt mál og Pétur Pétursson þulur til áratuga er einn þeirra. Hann er alls ekki sáttur við stöðu íslenskunnar í dag. Hann segir hana hörmulega og aðeins þurfi að hlusta á fjölmiðla til þess að komast að því. Þannig hafi til að mynda heyrst talað um að vinna við „að búa til identity" og að það sé „challenge." Einnig séu Alþingismenn slæmir og þeir séu alltaf í boltaleik og segist senda boltann á hvorn annan í stað þess að spyrja bara hvað viðkomandi hafi til málanna að leggja. Pétur segir að fámennari þjóðir en Íslendingar hafi lagt ríka áherslu á að vernda tungu sína. Á árum áður var danskan vágestur í íslenskri tungu og minnir Pétur á að í Pilti og stúlku láti Jón Thoroddsen eina stúlkuna hljóða upp yfir sig: Ó , gud Stine, gud Stine, sem var hátturinn þá, en í dag er það enskan og því kynntist Pétur hjá afkomanda sínum í jólaboði. Hann segir að þar hafi ung stúlka sagt „Oh my god," þegar hún fékk fallega jólagjöf. Pétur ætlar á næstunni ásamt Eyjólfi Jónssyni sundkappa og Helgu Steffensen brúðuleikhúskona ætla á næstunn í leikskóla í því skyni að fá börnin þar til að hætta að segja ókey, en segja þess í stað, allt í lagi. Og á degi íslenskrar tungur ætlar Pétur að gefa þjóð sinni og tungu gjöf. Hann segist vilja tala um fortíðarljóma í stað þess að ræða um „nostalgiu."