Allur gangur á skólahaldi

Allur gangur virðist vera á skólahaldi í dag, vegna fjarvista kennara, einkum á höfuðborgarsvæðinu, en víða í strjálbýlinu er það með eðlilegum hætti. Sumstaðar er engin kennsla, annarsstaðar er aðeins yngstu bekkjunum kennt, sumstaðar er einskonar gæsla fyrir yngstu börnin þar sem kennara vantar og enn annarsstaðar er sumum bekkjum kennt, en öðrum ekki. Í mörgum tilvikum gekk foreldrum illa að afla sér upplýsinga í morgun um það hvort börn þeirra ættu að mæta eða ekki og hafa margir foreldrar þurft að sækja börn sín aftur í skólana og taka þau með í vinnu eða fá frí, í þeim tilvikum þar sem ekki er hægt að hafa börn í vinnunni. Af viðtölum við marga foreldra og börn í morgun má ráða að mikil ólga sé orðin í þjóðfélaginu vegna þessa ástands og skeytir fólk skapi sínu ýmist á kennurum, svietarfélögunum eða ríkisvaldinu.