350 milljónir í nýja heilsugæslu

Framkvæmdir við stækkun Heilbrigðisstofnunar Siglufjarðar um þúsund fermetra og endurnýjun núverandi húsnæðis alveg frá grunni hefjast á næsta ári að sögn Konráðs Baldvinssonar, framkvæmdastjóra stofnunarinnar. Heildarkostnaðurinn er áætlaður um 350 milljónir króna. "Við erum að byggja nýja heilsugæslustöð," segir Konráð. "Núverandi heilsugæsla er á tæpum 150 fermetrum og það er allt of lítið." Konráð segist binda vonir við að Ólafsfirðingar sæki heilbrigðisþjónustu til Siglufjarðar eftir að Héðinsfjarðargöng verða komin í gagnið árið 2009. "Ólafsfirðingar eru sjálfir með litla heilsugæslustöð en eftir að göngin verða tilbúin er borðliggjandi að þeir nýti sér þjónustuna hér á Siglufirði. Við gerum ráð fyrir því," segir Konráð. "Við vonumst til þess að framkvæmdum við Heilbrigðisstofnunina ljúki vorið 2007." Tæplega áttatíu manns starfa hjá stofnuninni og segist Konráð ekki reikna með því að starfsmönnum verði fjölgað í bráð.