Siglfirðingar vongóðir um göng

Bæjaryfirvöld á Siglufirði hafa þegar hafið framkvæmdir sem tengjast gerð Héðinsfjarðarganga milli Siglufjarðar og Ólafsfjarðar. Verið er að byggja brú yfir Fjarðará sem tengist vegi sem liggur að gangamunnanum. Runólfur Birgisson, bæjarstjóri Siglufjarðar, segir að gengið sé út frá því sem vísu að ný sex milljarða króna göng milli Siglufjarðar og Ólafsfjarðar verði boðin út á næsta ári. Framkvæmdir hefjist síðan árið 2006 og þeim ljúki árið 2009. Mikil óánægja varð meðal bæjarbúa fyrir rúmu ári síðan þegar gangagerðinni var frestað um eitt ár. Vegalengdin milli Siglufjarðar og Ólafsfjarðar er nú 60 kílómetrar að sumri, en 240 kílómetrar þegar Lágheiðin er ófær að vetri. Við opnun ganganna skilja 15 kílómetrar bæina að. Héðinsfjarðargöng eru forsenda fyrir sameiningu Siglufjarðar við önnur sveitarélög við Eyjafjörð. Viðræður milli sveitarfélaganna eru í fullum gangi og hefur verið samið við Háskólann á Akureyri um að gera hagkvæmnisathugun á sameiningu þeirra. Einnig mun háskólinn gera könnun meðal íbúa á svæðinu.