Verðhækkanir koma niður á útgerð

Olíuverðshækkanirnar að undanförnu koma harkalega niður á útgerð stórra frystitogara sem nota á annan tug tonna af olíu á sólarhring fyrir hátt í hálfa milljón króna á dag. Stóru frystitogararnir eru bæði með aflmiklar aðalvélar, fiskvinnslubúnaðurinn um borð er knúinn áfram með olíu og loks knýr olía frystinguna sjálfa. Í heild er talið að núgildandi olíuverð muni valda útgerðinni um það bil tveggja og hálfs milljarðs kostnaðarauka á ársgrundvelli miðað við olíuverðið um áramót. Tonnið af gasolíu til skipa kostar nú rúmlega 40 þúsund krónur þannig að olíureikningurinn úr einum meðaltúr upp á um það bil mánuð getur numið 12 til 15 milljónum króna. Ef allur flotinn er skoðaður nemur kostnaðaraukinn vegna hækkana að undanförnu um tveimur og hálfum milljarði króna á ársgrundvelli. Olíueyðsla kolmunnaskipanna er miklu meiri, eða upp undir tuttugu tonn á sólarhring, þar sem þau eru með mjög stórar vélar til að geta dregið níðþung veiðarfærin. Ljóst er að miðað við aflabrögð á þeim veiðum að undanförnu, og miðað við afurðaverð, er orðið talsvert tap á kolmunnaveiðum.