Enn tekið alvarlega

Lögreglan tekur ennþá alvarlega neyðarkallið sem barst síðastliðinn fimmtudag, um að tuttugu frakkar væru veikir, af matareitrun, á hálendinu. Jónína Sigurðardóttir, aðstoðaryfirlögregluþjónn, hjá fjarskiptadeild ríkislögreglustjóra, sagði í samtali við fréttastofuna, nú fyrir hádegi, að þótt ýmislegt bendi til þess að neyðarkallið hafi verið gabb, sé ennþá gengið út frá því að það hafi verið raunverulegt. Lögreglan sé ekki tilbúin til þess að afskrifa þann möguleika. Lögreglan hefur fengið þrettán vísbendingar, sem nú er verið að kanna, og meðal annars farið aftur yfir svæði sem þegar hafi verið könnuð. Einnig sé verið að kanna skála sem séu á leitarsvæðinu, eða í grennd við það. Eins og fram hefur komið var neyðarkallið mjög óljóst, og þar sem það kom um talstöð, hefur ekki verið hægt að rekja það og staðfesta. En, lögreglan vill leita af sér allan grun, áður en hún blæs málið af.