Merki UNESCO afhjúpað á Þingvöllum

Merki heimsminjaskrár Sameinuðu þjóðanna verður afhjúpað á Þingvöllum við hátíðlega athöfn á morgun. Meðal gesta verður Francesco Bandarin, yfirmaður heimsminjaskifstofu UNESCO, sem mun flytja ávarp ásamt Birni Bjarnasyni, formanni Þingvallanefndar, og Margréti Hallgrímsdóttur, formanni samráðsnefndar um heimsminjaskrá. Þingvellir voru einróma samþykktir á heimsminjakrána á fundi nefndar um arfleifð þjóðanna í Suzhou í Kína 2. júlí síðastliðinn. Með samþykktinni eru Þingvellir meðal tæplega 800 menningar- og náttúruminjastaða á heimsminjaskránni sem taldir eru hafa einstakt gildi fyrir alla heimsbyggðina.  Í tilkynningu segir að vinna við umsóknina hafi verið langt ferli þar sem óháðir sérfræðingar lögðu mat á gildi staðarins og hvernig staðið er að verndun hans. Umsóknin um Þingvelli var lögð fram í febrúar 2003. Í framhaldi af umsókninni samþykkti Þingvallanefnd hinn 2. júní 2004 stefnumörkun næstu tuttugu ára fyrir þjóðgarðinn sem skipti miklu máli fyrir samþykkt á heimsminjaskrána.  Ísland gerðist aðili að sáttmálanum um heimsminjaskrána árið 1995 en hann var samþykktur á þingi menningarmálastofnunar Sameinuðu þjóðanna árið 1972. Þjóðir sem standa að sáttmálanum hafa sameinast í því verkefni að bera kennsl á og varðveita merkilegustu náttúru- og menningarminjar í heiminum fyrir komandi kynslóðir. Sáttmálinn er mjög einstakur að því leyti að í honum eru náttúruvernd og friðun menningarminja tengd saman í einu skjali. Athöfnin á morgun hefst klukkan 14:30 við fræðslumiðstöðina við Hakið og eftir ávörp verður gengið niður Almannagjá þar sem barnakór Skálholtskirkju og Skálholtskórinn munu syngja. Sigrún Hjálmtýsdóttir mun syngja og Gunnar Eyjólfsson og Steindór Andersen munu flytja rímur og texta tengda Þingvöllum.