Skólastarf lamað

Tugum þúsunda grunnskólabarna var snúið frá skólum sínum víða um land í morgun. Margir skólar voru lokaðir og starfsemin hálflömuð vegna fjarvista kennara. Grunnskólakennarar virtust svo harmi slegnir, vegna lagasetningar stjórnvalda, að þeir réðu ekki við að mæta til vinnu í morgun. Engar tilkynningar höfðu borist frá skólum eða fræðsluyfirvöldum í morgun um að skólahald félli víðast hvar niður, að hluta eða alveg. Hálfgert öngþveiti og ringlureiðs skapaðist við suma skólana þegar foreldrar, einkum yngstu barnanna, biðu með börnum sínum eftir að fá úr því skorið hvort af skólahaldi yrði eður ei. Í Reykjavík mætti tæpur fimmtungur kennara til starfa. Í fáeinum skólum á landsbyggðinni mættu allir, annars staðar sumir þeirra og víða enginn. Foreldrar sem mættu með börn sín í skóla vissu ekki neitt í sinn haus og voru afar ósáttir með ástandið. Ljóst var að ástandið reyndi á þolrifin hjá mörgu foreldrinu og kennarar báru sig lítt betur. Þeir sem fréttastofan ræddi við í dag sögðu sorg og reiði hafa kallað fram veikindin og gert það að verkum að þeir treystu sér ekki til vinnu, enda dæmi um að þeir hafi einfaldlega brotnað saman í morgunsárið. Um helgina funduðu kennarar víða, óformlega, en ítreka að ekki sé um að ræða samræmdar aðgerðir. Það er innihald lagasetningar stjórnvalda sem virðist framkalla veikindin og skilaboð kennara eru skýr. Þeir segjast ekki munu beygja sig undir slíkt valdboð eftir sjö vikna verkfall og líkja aðgerðum stjórnvalda við hryðjuverk. Kennarar í Reykjanesbæ fjölmenntu til kyrrðarstundar í Keflavíkurkirkju í leit að styrk fyrir skóladaginn, en þrátt fyrir þá stund var skólastarfið hálf lamað þar á bæ, líkt og svo víða annars staðar. Dröfn Rafnsdóttir, varaformaður kennarasambands Reykjaness, segir að dagurinn í dag sé mikill sorgardagur fyrir kennara og því hafi þótt viðeigandi að fá stund með presti til þess að ná áttum. Og það var víðar sem fólk kom saman til kirkju vegna ástandsins í grunnskólum. Foreldraráð Borgarskóla, bauð foreldrum og börnum til kyrrðarstundar í Grafarvogskirkju síðdegis, en fjöldi barna mun hafa haldið grátandi heim í morgun þegar ljóst var að enginn kennari við skólann hafði heilsu til að kenna.