Sprengihleðsla í veiðarfærunum

Sprengihleðsla úr bresku tundurdufli síðan í seinni heimsstyrjöldinni kom upp með veiðarfærum togarans Brettings í gær þar sem hann var að veiðum í Rósagarðinum út af Suðausturlandi. Sprengjusérfræðingar Landhelgisgæslunnar héldu þegar austur og nálægt miðnætti kom togarinn til Fáskrúðsfjarðar. Sprengihleðslan var 135 kíló og illa farin. Hún var tekin á land í samvinnu við lögreglu og var hafnarsvæðinu lokað á meðan. Síðan var farið með sprengihleðsluna utar í fjörðinn og þar var henni eytt. Þetta er í annað sinn á skömmum tíma sem Brettingur kemur með tundurdufl til hafnar en Bretar lögðu yfir 90 þúsund tundurdufl í sjóinn austur af Íslandi á stríðsárunum.