Baldur stofnar hreyfingu

Baldur Ágústsson, sem freistaði þess að verða forseti íslensku þjóðarinnar fyrir tæpum mánuði, hefur stofnað hreyfingu einstaklinga sem vilja bæta íslenskt samfélag. Hann segist hafa fundið mikinn hljómgrunn á meðal fólks um baráttumál sín í kosningabaráttunni, t.a.m. skuldasöfnun ungmenna, aðbúnað aldraðra, fátækt og fíkniefnavandann. Sá áhugi hafi orðið honum hvatning til að tengjast fólki og því muni heimasíða hans í framtíðinni verða miðstöð hreyfingarinnar sem hann kallar „Við fólkið“. Baldur sagði í viðtali við Arnþrúði Karlsdóttur á Bylgjunni í morgun að hann vilji sameina fólk um þessi málefni - og fleiri - og ekki bara fólk sem kaus hann. Hann vill gefa fólkinu eina rödd um þau þjóðfélagsmál sem brenna á þeim og það vill sjá úrbætur í. Baldur vísar á vefsíðu sína í þessum efnum en slóðin er www.landsmal.is. Aðspurður hvort hann reiknaði með að bjóða sig fram í næstu Alþingiskosningum sagði Baldur svo ekki vera.  Hægt er að hlusta á brot úr viðtali Arnþrúðar við Baldur í morgun með því að smella á hlekkinn sem fylgir fréttinni.