Fjármálavandræði ungs fólks aukast

Því miður sjáum við oft mikla fjölskylduharmleiki vegna ábyrgðarmennsku," sagði Ásta S. Helgadóttir, forstöðumaður Ráðgjafarstofu um fjármál heimilanna, um ábyrgðir foreldra eða annarra ættingja á lántökum ungs fólks. Fjölgun hefur orðið á milli ára á fólki innan tvítugs sem leitað hefur til ráðgjafarstofunnar vegna þess að það hefur steypt sér í fjárhagsvanda, sem það ræður ekki við án aðstoðar. "Oftar en ekki er ungt fólk með ábyrgðarmenn, foreldra, ættingja eða aðra," sagði Ásta. Hún sagði það þó lofsvert að þróunin hefði verið sú, bæði hjá bönkum og sparisjóðum, að nú væri meira farið að athuga viðskiptasögu viðkomandi. Þá hefðu bankar, viðskiptaráðuneytið og Neytendasamtökin skrifað undir samkomulag varðandi ábyrgðarmennsku árið 2001, þar sem bönkunum væri gert skylt að upplýsa ábyrgðarmenn um það sem þeir væru að gangast undir. Ef skuldin væri yfir milljón væri það skylda að aðalskuldari færi í greiðslumat. "Aðalmálið er það, að aðgangurinn að fjármagni er auðveldari," sagði Ásta. "Eftir því sem frelsið eykst krefst það meiri varkárni af einstaklingunum. Auglýsingamennskan af öllu tagi er orðin mjög mikil meðal ungs fólks, en mér finnst jafnframt þurfa að horfa til ábyrgðar foreldranna. Þeir þurfa líka að uppfræða börnin um þessi mál, því þarna spila svo margir þættir inn í. Við lifum í miklu neyslusamfélagi," bætti Ásta við. "Að sjálfsögðu erum við fyrirmyndir barnanna okkar og þurfum að haga okkur samkvæmt því." Grunnskólarnir hafa nú tekið fjármálafræðslu inn í lífsleikni og sagði Ásta það af mjög af hinu góða. Hún kvaðst sjálf vera með fræðslu í Foreldrahúsi fyrir 15 - 18 ára unglinga. Þar fyndi hún best hversu brýn þörf væri fyrir slíkt efni. Þess skal getið vegna missagnar í Fréttablaðinu í gær, að símatímar ráðgjafarstofunnar eru alla daga frá kl. 9 - 12.