Kirkjan styrkir stöðu sína

Kirkjan virðist standa ágætlega að vígi samkvæmt nýlegri Gallupkönnun. Meirihluti landsmanna telur stöðu hennar sterka enda þótt stór hluti þjóðarinnar segi að greina eigi á milli ríkis og kirkju. Fleiri telja sig eiga mikla samleið með kirkjunni en í eldri könnunum en þátttaka hennar í þjóðfélagsumræðum er hins vegar umdeild. Biskupsstofa kynnti þessar niðurstöður í gær en þær eru úr könnun Gallup um trúarlíf Íslendinga sem gerð var í febrúar og mars síðastliðnum. Hringt var í 1500 manns af handahófi og var svarhlutfall 60,4 prósent. 56% landsmanna telur að staða Þjóðkirkjunnar almennt sé sterk en þriðjungur þjóðarinnar er á öndverðri skoðun. Þjóðkirkjufólk hefur almennt meiri trú á stöðu kirkjunnar en samt segja 45 prósent þeirra sem aldrei sækja guðsþjónustur að kirkjan standi styrkum fótum. Þegar þjóðkirkjufólk var spurt hversu mikla samleið það telur sig eiga með kirkjunni segist 71 prósent eiga mikla eða nokkra samleið á meðan 29 prósent sögðust eiga litla eða enga samleið með stofnuninni. Séu þessar niðurstöður bornar saman við könnun sem gerð var á árunum 1986-1987 kemur í ljós að mun fleiri telja sig eiga mikla samleið með kirkjunni á meðan fjöldi óánægðra stendur nánast í stað. Helmingur úrtaksins var spurður um afstöðu sína til aðgreiningar ríkis og kirkju og sögðust 57 prósent kjósa aðgreiningu. Stærri hluti kjósenda Samfylkingarinnar virðist fylgjandi aðgreiningu en hjá hinum flokkunum. Fjórðungur aðspurða telur að kirkjan og ríkið eigi einfaldlega ekki samleið og fimmtungur lagði áherslu á að öll trúfélög ættu að vera jafn rétthá. Afgangur úrtaksins var spurður hvort hann væri hlynntur aðskilnaði ríkis og kirkju og sögðust 46% vera þeirrar skoðunar. Það er lægra hlutfall en yfirleitt er þessarar skoðunar í þjóðarpúlsi Gallup. Deildar meiningar eru um þátttöku kirkjunnar í þjóðfélagsumræðum. Tæpur helmingur landsmanna er fylgjandi að kirkjan taki meiri beinan þátt í umræðunni en fjörtíu prósent eru því andvíg. Andstaða sjálfstæðismanna er eindregnust í þessum efnum en minnst á meðal framsóknarmanna.