Tvö sjúkraflug til Grænlands

Tveir sjúklingar komu með sjúkraflugi frá Grænlandi í gær. Flugfélag Íslands sinnti þremur sjúkraflugum í einu. Ari Fossdal, afgreiðslustjóri Flugfélags Íslands á Akureyri, segir að beiðni um sjúkraflug til Kúlusúkk í Grænlandi hafi borist aðfaranótt mánudags en ekki hafi verið flugfært fyrr en klukkan tíu í gærmorgun. Um hádegi hafi annað kall komið frá Constable Point í Grænlandi, á milli staðanna sé þriggja tíma flug og því hafi önnur vél verið send. Um tvær klukkustundir tekur að fljúga til beggja staðanna. Ari segir að tvær vélar séu til taks í sjúkraflug á Akureyri og þegar óskað var eftir sjúkraflugi til Hafnar í Hornafirði um eittleytið fór vél frá Reykjavík í útkallið.