Vandi framhaldsskóla leystur

Vandi framhaldsskólanna hefur verið leystur með fjárveitingu úr fjáraukalögum, segir Þorgerður Katrín Gunnarsdóttir, menntamálaráðherra. Gagnrýnt hefur verið að fjárveitingu vanti fyrir allt að 700 nemendur, sem sótt hafa um framhaldsskólanám næsta haust, en skólastjórnendur segja þennan vanda hafa verið fyrirsjáanlegan, en lítið hafi verið að gert. Þorgerður Katrín Gunnarsdóttir, menntamálaráðherra, segir þetta þegar hafa verið leyst. Það hafi tekið ráðuneytið um viku tíma að leysa vandann sem hlaust af mun fleiri umsóknum en búist hafði verið við. Þetta sé í raun jákvætt vandamál. Þorgerður Katrín segir að samkvæmt fjáraukalögum verði auknu fé nú veitt til framhaldsskólanna. Hún segir brýnt að horfa til framtíðar á hverjum tíma, til að tryggja að svona óvissuástand komi ekki upp aftur og hún segist þess fullviss að allir nemendur fái inni næsta vetur. Flestir nýnemar sem komi upp úr grunnskóla fái inni en mál þeirra sem eru eldri leysist líkt og undanfarin ár, það fari eftir framboði á námsbrautum.