Húsbílaklósett tæmd í leyfisleysi

"Við viljum að þessu sé fylgt eftir í lögreglusamþykkt þannig að öllum geti verið ljóst að kjósi menn að leggja húsbíl eða tjalda innan bæjarmarkana verði þeir að greiða gjald. Vilji þeir ekki gera það verði þeir að fara út fyrir bæjarmörkin. Það er öllum frjálst að tjalda til einnar nætur á óræktuðu landi við þjóðveg eitt," segir Sigrún Kapitola Guðrúnardóttir, sem rekur Þjónustumiðstöð SKG ásamt Huga Einarssyni, eiginmanni sínum. Mikil aukning húsbíla veldur því að bæjarráð Hornafjarðar hyggst endurskoða lögreglusamþykkt bæjarins með tilliti til þess hvar megi tjalda og hvar leggja húsbílum innan bæjarmarkanna. Ákvörðunin er tekin vegna athugasemda Þjónustumiðstöðvarinnar sem rekur tjaldstæði og útleigu smáhýsa í bænum. "Þótt þetta fólk sé ekki á tjaldstæðinu okkar finnst því sjálfsagt að nota okkar þjónustu, til dæmis að tæma ferðasalerni og fylla vatnstanka. Okkur finnst þetta blóðugt,"segir Sigrún.