Steyptist 27 metra í stórgrýti

Það liggur við að hægt sé að tala um kraftaverk að vörubílsstjóri skyldi komast lítið skaddaður úr slysi sem varð í Búðardal síðdegis í dag. Maðurinn var að flytja möl í vörubíl til Búðardals þegar hann kemur að einbreiðri brú yfir Laxá við Laxárdal. Þegar hann kemur á brúnna sér hann jeppa koma á móti sér. Jeppinn nær að stöðva og bakka en vörubíllinn náði því ekki og rakst hann því á jeppann. Hjón með tvö börn sem voru í jeppanum slösuðust ekki alvarlega en vörubíllinn fór í gegnum vegriðið og steyptist 27 metra niður í stórgrýti. Að sögn lögreglu er bíllinn gersamlega ónýtur, þá sé hús bílsins mikið skemmt, sérstaklega bílstjóramegin. Maðurinn var fluttur í skyndi í sjúkrabíl til Reykjavíkur. Læknar á slysadeild Landsspítala-háskólasjúkráhúss í Fossvogi sögðu það með ólíkindum að maðurinn skyldi sleppa eins vel og raun ber vitni en að öllum líkindum verður hann útskrifaður í kvöld. Hann er óbrotinn en gert hefur verið að yfirborðsáverkum.