Lík Sri Rhamawati fundið

Lík Sri Rahmawati fannst í djúpri og þröngri hraunsprungu í Almenningi fyrir sunnan Hafnarfjörð í dag. Hákon Eydal, sem hefur játað að hafa banað fyrrum sambýliskonu sinni og barnsmóður, Sri Rahmawati, vísaði lögreglu á réttan stað eftir að honum var sagt að rannsókn lögreglu sýndi að fyrri staðsetning sem hann gaf upp stæðist ekki. Lögreglan hefur rannsakað hvarf Sri Rhamawati, 33 ára gamallar konu sem síðast var vitað um að morgni sunnudagsins 4. júlí sl. Lögreglu var tilkynnt um hvarf hennar að kvöldi mánudagsins 5.júlí og rannsókn hófst strax að morgni þriðjudagsins 6. júlí. Fljótlega vöknuðu grunsemdir um refsivert athæfi og að ekki væru eðlilegar skýringar á hvarfi hennar. Eftir ítarlega vettvangsrannsókn strax um morguninn, í íbúð þar sem síðast var vitað um hana, var barnsfaðir hennar og fyrrum sambýlismaður handtekinn. Daginn eftir var hann leiddur fyrir dómara og gerð krafa um gæsluvarðhald sem dómari féllst á. Það var síðan framlengt að kröfu lögreglu til 11. ágúst n.k. Í tilkynningu lögreglunnar segir að þann 27. júlí hafi hinn handtekni bent á staðinn, sem hann sagðist hafa komið líkinu af Sri Rhamawati fyrir á. Sagðist hann hafa kastað því fram af klettum á Presthúsatöngum á sunnanverðu Kjalarnesi.. Þann 28. júlí játaði hann fyrir lögreglu að hafa orðið Sri Rhamawati að bana með barefli í íbúð sinni að morgni sunnudagsins 4. júlí. Þá segir í tilkynningu lögreglunnar að frekari rannsóknir á vettvangi á Kjalarnesi hafi gert frásögn hins handtekna ótrúverðuga. Í dag féllst hann svo á að vísa lögreglunni á lík Sri Rhamawati þar sem hann hafði komið því fyrir í hraunsprungu utan við Hafnarfjörð og urðað yfir. Við leit þar fannst líkið á tilgreindum stað. Lögreglan í Reykjavík þakkar öllum, sem veitt hafa aðstoð við rannsóknina, þolinmæðina og þeirra góða liðsinni. Rannsókn málsins heldur áfram.